Шымкент қаласының тұрғыны үйінде тыйым салынған “қарасора” өсімдігін өсіргені анықталды, – деп хабарлайды ERNUR.KZ.
Шымкент қаласының Полиция департаменті Абай ауданы Полиция басқармасының қызметкерлері “Қарасора” жедел-профилактикалық іс-шарасын өткізу барысында құрамында есірткі заттар бар өсімдікті өсіру фактісін анықтады. Жасы 40-қа таяп қалған қала тұрғыны өз үйінде өсіруге тыйым салынған “қарасора” өсімдігін пластикалық шелектерде егіп-өсірумен айналысқан.
Аталған факт ҚР Қылмыстық кодексінің 300-бабының 1-бөлігімен (құрамында есiрткi заттар бар, өсiруге тыйым салынған өсiмдiктердi заңсыз егіп-өсіру) сотқа дейінгі тергеп-тексерудің бірыңғай тізіліміне тіркелді.
Күдіктіге қатысты ешқайда кетпеу туралы қолхат түріндегі бұлтартпау шарасы қолданылды.
